Få lånekort
Alle har rett til å låne bøker og anna materiale gratis frå biblioteket. Dei som ønskjer å låne frå biblioteka våre må ha eit gyldig lånekort. Lånekort er gratis.
Dei fleste lånarar har i dag eit nasjonalt lånekort. Det vil seie at lånekortet kan brukast på alle norske bibliotek. Du må vise legitimasjon og oppgje fødselsnummer/DUF-nummer ved registrering. Lånarar som ikkje har fødselsnummer/DUF-nummer tilgjengeleg eller som ikkje ønskjer å gje det opp ved registrering, kan få eit lokalt lånekort som er gyldig på biblioteka i Høyanger kommune. Skular, barnehagar og andre institusjonar som vert registrert med institusjonen sitt namn og ansvarsperson, får òg lokale lånekort.
Slik gjer du det
Du kan få lånekort på hovudbiblioteket i Høyanger sentrum. Barn under 15 år må ha løyve frå føresette.
Du må fylle ut eit skjema med kontaktinformasjon på biblioteket. Ta med legitimasjon. Alternativt kan laste ned og fylle ut skjema på førehand (pdf, opnast i ny fane).
Du kan også lage deg digitalt lånekort på nett
- Registrer deg (nb.bib.no)
- Identifiser deg gjennom ID-porten (T.d. MinID, BankID)
- For å få full tilgang til alle tenester ved biblioteka våre må du kontakte oss for å knytte deg opp.
- Det digitale lånekortet vert brukt på same måte som eit fysisk kort.
Lånekort på mobilen – Bibliofil-appen
Ved å laste ned Bibliofil-appen kan du få lånekortet ditt på mobilen. I tillegg får du tilgang til dei andre tenestene til biblioteket. Du finn bibliofil-appen i Google Play og Apple Store.
Slik gjer du det
Last ned appen Bibliofil, vel “Vestland” og deretter “Høyanger bibliotek”.
Logg deg på med lånenummeret ditt som brukarnamn (står under strekkoden på lånekortet) og PIN.
Har du ikkje PIN-kode? Trykk på “glemt PIN” eller kontakt biblioteket på telefon 577 11 590
Lån i meirope bibliotek
Biblioteket i Høyanger sentrum får ei meirope avdeling i november 2021. Dette betyr at du kan nytte biblioteket i ubetjent opningstid. Du må vere over 18 år for å nytte tilbodet.
For å få tilgang til meirope må du oppgradere lånekortet til eit nøkkelkort, og signere ei kontrakt som gjeld meirope. Dette gjer du ved personlig oppmøte på biblioteket i Høyanger sentrum i betjent opningstid. Last gjerne ned Kontrakt for bruk av meirope bibliotek (pdf, opnast i ny fane) og fyll den ut på førehand.
Les meir på sida om Meirope bibliotek.
Lån frå andre bibliotek
Dersom du ikkje finn ei bok, film eller anna medium i Høyanger bibliotek sin katalog vil vi gjere vårt beste for å skaffe det for deg uansett. Høyanger bibliotek er ein del av det nasjonale biblioteknettverket og kan bestille bøker og anna materiale frå bibliotek over heile landet, både frå andre folkebibliotek og universitets- og høgskulebibliotek. Vi kan også skaffe bøker frå bibliotek i utlandet. Om du har nasjonalt lånekort, kan du velje å bestille materiale sjølv.
Lån frå andre bibliotek er gratis, nett som lån frå eige bibliotek. Du som lånar hentar og leverer tilbake materialet her på biblioteket, medan vi sørgjer for frakta mellom biblioteka.
Tinga materiale kjem vanlegvis innan ei veke, men det varierer avhengig av kor enkelt det er å få tak i og kva bibliotek som har det tilgjengeleg. Kom innom, ring, send e-post eller bruk kontaktskjemaet i websøket vårt for å bestille og fornye lån. Er du usikker på kva du skal ha er det nok best å ringe eller komme innom biblioteket slik at vi er sikre på at det er det rette som blir bestilt. Mest mogleg nøyaktige opplysingar om tittel, forfattar og evt. utgåve/utgivelsesår gjer det raskare og enklare å bestille det du vil ha.
Fornying av lån frå andre bibliotek
Det er eigarbiblioteket sine fristar som gjeld ved slike lån. Ver merksam på at det kan vere andre fristar og reglar enn for Høyanger bibliotek. Det er eigarbiblioteket som avgjer om det er greit å fornye lånet. Ta kontakt med oss for å fornye lån frå andre bibliotek, så gjev vi deg beskjed så raskt som mogleg.
Korleis kan du bestille sjølv?
Bruk Biblioteksøk til å bestille sjølv. Du kan berre bestille materiale frå andre bibliotek dersom du har nasjonalt lånekort og pinkode.
Du hentar og leverer på ditt lokale bibliotek. Hugs å velje rett hentebibliotek dersom lånekortet ditt er knytt til fleire bibliotek.